Rúrik Gíslason leikmaður Sandhausen má hvorki mæta til vinnu né tjá sig um ástæðu þess. Frá þessu sagði Hjörvar Hafliðason í Dr. Football í dag.

Rúrik hefur ekki spilað með Sandhausen eftir að deildin fór af stað á nýjan leik og má ekki mæta til æfinga.

Málið snýst um launamál og lækkun á þeim vegna kórónuveirunnar en samkvæmt heimildum 433.is voru laun Rúriks lækkuð án þess að ræða það við hann, um það snúast deildur hans og félagsins.

,,Rúrik Gíslason heldur áfram að vera í stúkunni, honum er ekki heimilt að æfa með liðinu. Hann má heldur ekki tjá sig, málið er hjá lögfræðingum,“ sagði Hjörvar í þætti dagsins.

Rúrik er 32 ára gamall en hann hefur leikið erlendis frá árinu 2005. Hann er samningslaus hjá Sandhausen í sumar og ljóst má vera að hann fer í nýtt félag.