Luke Chadwick fyrrum leikmaður Manchester United sagði frá því að það hafi verið erfitt fyrir sig að upplifa það að stanslaust væri gert grín að útliti hans. Chadwick kom upp hjá Manchester United og var mikið rætt um útlit hans, í þættinum They Think It’s All Over á BBC var ítrekað gert grín að því að hann væri ljótur.
Þetta særði Chadwick sem var ungur að árum og hann sér eftir því að hafa ekki rætt málið við ríkissjónvarp landsins. „Þessi þáttur var vinsæll, milljónir horfðu á,“ sagði Chadwick. „Ég man eftir því þegar þetta gerðist fyrst, þá var ég í áfalli. Ég vildi ekki athygli þrátt fyrir að spila fyrir Manchester United.“
,,Ég óttaðist hvern einasta föstudag. Ég hafði ekkert sjálfstraust fyrir og þetta gerði það verra. Ég var alltaf að íhuga að tala við BBC, ég var 19 og 20 ára og vildi bara að þetta myndi hætta.“
Nick Hancock sem kom að þættinum hefur beðið Chadwick afsökunar en hann kom í viðtal á BBC í morgun. „Ég finn til með honum og að heyra hvernig hann talar. Ég vil biðjast afsökunar og ég finn til með Chadwick að hafa upplifað þetta,“ sagði Hancock.
„Ég hitti Chadwick á þessum tíma eftir leik með Stoke og hann spjallaði við mig og son minn. Það segir okkur hversu stór karakter hann er.“
