Aron Bjarnason er að ganga í raðir Vals eins og við greindum fyrst frá í gær. Fleiri lið höfðu áhuga á Aroni en fjárhagurinn hjá mörgum er erfiður vegna kórónuveirunnar.
Breiðablik seldi Aron til Újpest í Ungverjalandi á síðasta ári en þar hefur hann ekki fundið taktinn. Kantmaðurinn knái átti frábæra tíma með Breiðablik áður en félagið seldi hann út.
Á Stöð2 Sport í gær var rætt um þessa frétt okkar og því velt fyrir sér hvort leikmenn Vals yrðu pirraðir. Leikmenn Vals tóku á sig talsverða launalækkun á dögunum vegna kórónuveirunnar.
„Þetta er ágætis „argument“ að leikmenn séu að taka á sig niðurskurð og svo er fenginn leikmaður, en hvað er rétt að gera? Myndi þetta pirra mann? Nee, ábyggilega ekki,“ sagði Hjörvar Hafliðason á Stöð2 Sport í gær.
Freyr Alexanderrsson sagði að þetta gæti pirrað suma. „Þetta gæti pirrað leikmenn ef að það eru einhverjir í fjárhagslegum vandræðum út af ástandinu. Við vitum náttúrulega ekkert um það. En ef að menn eru að komast í gegnum þetta þokkalega þá held ég að allir fagni því að fá góðan knattspyrnumann inn í liðið.“