Ross Barkley klikkaði á vítaspyrnu í kvöld er Chelsea mætti Valencia í Meistaradeild Evrópu.

Barkley kom inná sem varamaður og fór óvænt á punktinn undir lokin og gat jafnað metin í 1-1.

Það bjuggust fáir við að Barkley myndi taka spyrnuna en hann tók síðast víti fyrir þremur árum síðan.

Þrátt fyrir það þá segir Frank Lampard, stjóri Chelsea, að Barkley sé númer eitt á blaði þegar kemur að vítum.

Barkley var aldrei öruggur á punktinum og fór skot hans í slá og yfir.

,,Ross er sá sem tekur vítaspyrnurnar. Hann var númer eitt á undirbúningstímabilinu og í kvöld þegar hann kom inná,“ sagði Lampard.

,,Ég veit ekki hvað leikmennirnir voru að ræða sín á milli en Jorginho og Willian voru spyrnumennirnir áður en Ross kom inná.“