Það muna margir eftir því þegar Liverpool og Arsenal gerðu 4-4 jafntefli í ensku úrvalsdeildinni árið 2009.

Það var dagur Rússans Andrey Arshavin en hann skoraði öll fjögur mörk Arsenal í leiknum.

Arshavin ræddi þennan sögufræga leik í dag en hann segist þó oft hafa spilað betur en þann dag.

,,Fyrir mig þá var þetta bara venjulegur leikur – ekkert sérstakt. Ég fann ekki fyrir neinu sérstöku fyrir leikinn,“ sagði Arshavin.

,,Þegar ég steig út á völlinn þá hugsaði ég með mér að við myndum ekki tapa. Það var það eins sem ég vissi fyrir leikinn.“

,,Auðvitað var ég ekki búinn að ímynda mér það fyrir leik að ég myndi skora fjögur mörk.“

,,Ef þú horfir á tölurnar þá var þetta besti leikurinn minn en miðað við spilamennsku þá hef ég oft spilað mun betur.“