Íslenska karlalandsliðið fer ekki beint á EM úr riðlakeppni keppninnar eftir markalaust jafntefli við Tyrki í kvöld.
Ísland þurfti á sigri að halda til að eiga möguleika á öðru sætinu en markalaust jafntefli var niðurstaðan.
Við eigum þó enn möguleika á að komast í lokakeppnina og förum í umspil í Þjóðadeildinni.
Við ræddum við Hannes Þór Halldórsson eftir leik:
,,Tilfinningin er svona tómleikatilfinning einhver. Við höfum verið með þetta markmið í marga mánuði að komast á EM með því að klára riðilinn,“ sagði Hannes.
,,Við vissum að eftir síðasta landsleikjahlé að þá yrði þetta langsótt. Við höfðum trú á þessu og höfum haft tök á Tyrkjunum.“
,,Nú er þetta farið en við erum mjög gíraðir og peppaðir í að klára þetta í mars. Þetta er svekkelsi núna en við erum með blóð á tönnunum að klára þetta.“