Aron Einar Gunnarsson, fyrirliði Íslands er klár í slaginn gegn Moldóvu í undankeppni EM. Hann er í sínu besta formi lengi, eftir gott sumarfrí.
,,Alveg klárt mál, eins og við töluðum um. Þjálfaraskipti hjá þeim, hvort það verði áherslubreytingar. Við höfum verið að einbeita okkur að sjálfum okkur, farið yfir klippur sem hægt er að fara yfir. Þurfum að spila okkar leik 100 prósent, byrja eins og í sumar. Mæta af fullum krafti, vera á tánum á morgun til að ná í þrjú stig,“ sagði Aron Einar um landsleikinn.
Aron skipti um lið í sumar og gekk í raðir Al-Arabi í Katar, honum líkar byrjunin þar vel.
,,Ég er góður, ég fékk gott sumar. Ég náði góðu undirbúningstímabili sem hefur skilað sér í fyrstu tvo leikina í Katar, ef ég væri í Championship þá væri ég búinn með 5-6 leiki. Ég er búinn með tvo, einbeita mér að mínum líkama. Ég vildi vera í mínu besta formi, ég veit hversu mikilvægir leikir þessir eru hjá landsliðinu. Við þurfum sex stig, einbeitingin er á fyrri leikinn. Við þurfum sex stig.“
Aron líkar deildin vel en segir það erfitt fyrir sig að vera varnartengilið í þessari deild.
,,Þetta hefur komið mér á óvart, opnir leikir. Ekki mikið um varnartaktík, fyrir varnartengilið þá eru þetta erfiðir leikir. ótrúlega lærdómsríkt og gaman. Við vorum að spila síðasta leik gegn einu af tveimur bestu liðunum. Það gekk vel, það er uppgangur. Það er verið að reyna að bæta þetta landslð þeirra, það er að takast. Þeir hafa eytt miklu púðri í deildina, og landsliðið sjálft. Þeir unnu Asíubikarinn, þeir eru á fínu róli. Það er gaman að taka þátt í þessu, það er öðruvísi en England. Ekki eins mikil keyrsla og pressa.“
Fjölskylda Arons er sátt með dvölina en hitinn er það mikill að fyrirliðinn nær ekki í neina brúnku.
,,Mjög vel, það er heitt á daginn. Ég er ekki tanaðasti maðurinn hérna, þetta byrjar mjög vel. Við erum búin að koma okkur vel fyrir, drengurinn byrjaður í skóla. Við erum virkilega ánægð með skrefið í eitthvað nýtt.“