Eins og flestir knattspyrnuaðdáendur vita þá er yfirleitt stranglega bannað að skipta um lið ef þú hefur haldið með sama liðinu í mörg ár.
Það er þó ekki regla sem allir fara eftir og einn af þeim sem ákvað að hundsa hana er Guðmundur Gunnarsson, bæjarstjóri á Ísafirði.
Guðmundur birti á dögunum pistil sem ber heitið ‘Þroskasaga’ og ræðir þar ást sína á fótbolta.
Guðmundur var lengi stuðningsmaður Manchester United en hann fékk nóg af því liði árið 2016.
Það var eftir komu þeirra Zlatan Ibrahimovic og Paul Pogba sem sömdu við félagið sem var þá undir stjórn Jose Mourinho.
,,Tveir karakterar, sem hafa sérstakt lag á að snúa hópíþrótt upp í eitthvað undarlegt egótripp. Mér fannst þetta glatað og hætti að halda með United,“ skrifar Guðmundur.
,,Þetta var árið 2016. En þótt ég væri orðinn fúll á móti þá fannst mér ég samt verða að eiga lið. Einhverja sem ég gæti kallað „mína menn“ og verið með í umræðunni.“
Guðmundur byrjaði því að skoða merki liða í neðri deildum Englands og viti menn, hann fann sér félag.
Ástríðan er gríðarlega mikil í neðri deildum Englands en mörg fyrrum stórveldi hafa síðustu áratugi fest sig í sessi sem lið í þriðju, annarri eða fyrstu deild.
,,Ég rakst fljótlega á lið sem er með uglu í skjaldarmerkinu og heitir eftir vikudegi. Mínir menn! Í dag held ég með Sheffield Wednesday.“
,,Það merkilega við þetta allt saman er að ég er aftur farinn að hafa gaman af enska boltanum. Sko, í neðri deildunum. Gaumgæfi úrslit, stúdera liðsuppstillingar og horfi stundum á blaðamannafundi ef ég hef tíma.“
Guðmundur segir ekkert vera að því að skipta um lið og nú er stóra spurningin: Er eitthvað rangt við það?