Kári Árnason var að venju í hjarta varnarinnar hjá Íslandi í kvöld er liðið mætti Tyrkjum á Laugardalsvelli.

Kári var flottur varnarlega í leik kvöldsins en íslenska liðið stóð sig heilt yfir frábærlega gegn erfiðu liði.

,,Við vorum að hlusta á ykkur félagana hjá Hjörvari, hafðiru ekki rétt fyrir þér? Sagðiru ekki 2-1? Vel gert!“ sagði Kári við Hörð Snævar Jónsson sem spáði réttum úrslitum í hlaðvarpsþættinum Dr. Football.

,,Við þurfum ekkert að hlusta en það er gaman að hlusta á ykkur. Við erum ekkert að pæla í þessu nánar.“

,,Við vitum hvað við getum og þetta er bara sama gamla bandið frá EM 2016. Það spilaði í dag og við svöruðum allri gagnrýnisröddum sem hafa verið um okkur.“

,,Við sköpuðum færi til að skora þriðja markið og þeir fá eitthvað horn. Það er smá klúður hjá okkur að fá hornið á okkur. Ég er með hann á kantinum og hann ýtir mér. Ég átti bara að renna mér í hann og negla boltanum burt. Ég ætlaði að vera eitthvað clever.“

Kári var svo spurður út í framherjann Kolbein Sigþórsson sem er mættur aftur eftir meiðsli.

,,Svo kemur Kolli inná og það er frábært að sjá hann aftur. Hann svarar öllum gagnrýnisröddum sem hafa verið í kringum hann. Það vita allir í liðinu hversu góður hann er og hann á að vera með þó hann geti spilað 10 eða 5 mínútur.“