Terry Ball er ástríðufullur áhugamaður um grísakótilettur
Lögreglan í borginni Athens í Georgíu-fylki handtók á dögunum mann eftir að símtal barst þar sem hann var sakaður um að reyna að „slást við alla í húsinu“. Þetta var í annað sinn á skömmum tíma sem að lögreglan þurfti að hafa afskipti af hinum 29 ára gamla Terry Ball. Í febrúar á þessu ári var hann handtekinn fyrir að flugskalla móður sína og henda í hana kótilettu.
Málið var í ferli innan bandaríska réttarkerfisins þegar símtalið barst um aðra uppákomu í tengslum við Ball. Það var fyrrnefnd móðir ofbeldis mannsins sem hringdi og tjáði lögreglu að Ball ætlaði að berja alla í húsinu. Ástæðan var sú að ótilgreindur fjölskyldumeðlimur hafði étið kótilettu sem Ball ætlaði að gæða sér á. Í staðinn fyrir kótilettuna voru aðeins núðlur í boði og því sturlaðist kótilettu-unandinn.
Allt var á rú og stúi í húsinu þegar lögreglu bar að garði og var Ball handtekinn á vettvangi. Í frétt FOX 29 kemur fram að hann hafi ítrekað tjáð lögreglu að hann væri afar ósáttur við afdrif kótilettunnar.
Atvikið í febrúar var sambærilegt. Ball var þá í miðjum klíðum að gæða sér á kótilettu í kvöldmat þegar hann varð sundurorða við móður sína. Hann henti þá í hana kótilettunni og stóð síðan upp og lamdi hana og skallaði.