Líkt og greint var frá í DV um liðna helgi telja stjórnmálafræðingar að sitjandi ríkisstjórn verði ekki stjórn mikilla athafna. Til þess sé hún einfaldlega of veik og of mikið sundurlyndi innan hennar. Eiríkur Bergmann, prófessor í stjórnmálafræði, sagði þar að besti vinur ríkisstjórnarinnar væri núverandi stjórnarandstaða. Sökum þess að innan hennar sé algjör óeining, einkum milli Framsóknarflokks og hinna þriggja stjórnarandstöðuflokkanna, sé stjórnarandstaðan algjörlega ófær um að bjóða upp á raunhæfan valkost við ríkisstjórnina. Af því leiði að stjórnin geti allt eins lullað í hægagangi út kjörtímabilið. Ekki eru þetta björgulegar lýsingar á stjórnmálum í landinu í dag. Veik og verklaus ríkisstjórn og sundruð stjórnarandstaða. Kjósendur hljóta að gera kröfu á báðar hliðar að fólk hysji upp um sig og sinni því sem það var kosið til.