Mikið hefur verið rætt um að kraftlyftingafólk drekki nú brjóstamjólk sökum þess hve mikið prótein hún innihaldi. Nú hefur leikkonan Tamera Mowry hugsanlega uppgötvað nýja leið til að losna við kvef – nefnilega að drekka brjóstamjólk.

„Þannig að systir mín þarf nauðsynlega á lækningu að halda. Hún er fárveik og ég sendi henni grein um lækningarmátt brjóstamjólkur og henni fannst í lagi að drekka brjóstamjólkina mína,“ skrifar tvíburasystir hennar Tia Mowry, á Instagram.

https://www.instagram.com/p/BuHygv_lH-Q/

„P.s. Hún hefur smakkað hana áður. Ég meina, hún er tvíburasystir mín,“ bætir hún við.

Tamera lofar síðan mjólkina í myndbandi á Instagram, en þess má geta að Tia eignaðist dóttur í maí í fyrra.

„Guð minn góður. Tia. Þetta er stórkostlegt,“ segir hún. „Brjóstamjólkin þín er besta mjólk sem ég hef smakkað á ævinni. Guð minn góður.“

Brjóstamjólk er mjög næringarrík og er hönnuð þannig frá náttúrunnar hendi að styrkja viðnám ungbarna gegn sýkingum. Þá inniheldur hún ýmis efni sem vinna gegn fjölda bakteríu- og veirusýkinga. Í brjóstamjólk er enn fremur fita, vítamín og steinefni, en eitt hefur hún ekki og það er járn.