Sögueyjan stóð svo sannarlega undir nafni um helgina. Guðni Th. Jóhannesson tilkynnti um framboð sitt á uppstigningardag. Steig upp og ákvað að mæta Ólafi Ragnari Grímssyni og öllum hinum frambjóðendunum. Virtist nú sem fullskipað væri á vígvellinum.

Fyrst dró þó til tíðinda á laugardag þegar nýr þáttastjórnandi Sprengisands á Bylgjunni, Páll Magnússon, sendi frá sér færslu á Twitter um að breyta þyrfti áður auglýstri dagskrá sunnudagsþáttarins. Stórtíðinda væri að vænta í tengslum við forsetakosningar. Glöggir menn áttuðu sig á að Davíð Oddsson væri að fara fram. Sú varð raunin.

Davíð skjallaði Ólaf Ragnar svo að eftir var tekið. Síðar sama dag var Ólafur Ragnar gestur í þættinum Eyjan á Stöð 2. Þar ræddi Björn Ingi við forsetann um vendingar dagsins. Ólafur Ragnar skjallaði Davíð svo að eftir var tekið. Miðað við látbragð Ólafs Ragnars í viðtalinu var ljóst að hann væri að hætta. Það fékkst staðfest í gær, mánudag. Við kveðjum farsælan forseta sem stóð í stafni í ólgusjó. Hann gerði það beinn í baki og sem brjóstvörn Íslands. Fyrir það verður hans minnst.

Viðtalið við Ólaf var sögulegt. Hann fór yfirvegað yfir hversu afskekktur á einskismannslandi forsetinn þarf að vera. Embættið er ekki bara móttökur og hátíðarræður. Um það blæs og þá þarf sá sem situr á Bessastöðum hverju sinni að geta tekið óvinsæla ákvörðun sem gengur þvert á vinskap og gamla flokkadrætti.

Nú eru allar líkur á að vígstaðan verði sú að Guðni Th. Jóhannesson og Davíð Oddsson takist á um þetta embætti. Fleiri gætu auðvitað blandað sér í þann slag, eins og Andri Snær. Guðni Th. mældist í könnun í gær með Golíatsfylgi. Samkvæmt könnun MMR mældist hann með tæplega 60% fylgi. Davíð Oddsson var ekki inni í könnuninni fyrr en á lokametrunum. Þó má reikna út frá þeim forsendum sem MMR gaf upp að Davíð sé með um 12% fylgi.

Davíð Oddsson er okkar umdeildasti sonur. Fólk virðist ýmist hreinlega sjá rautt þegar hann er nefndur – nú eða sakna hans. Hvort nógu margir sakni hans til að tryggja honum kjör er algerlega óvíst.

Guðni á góða möguleika, á því leikur ekki nokkur vafi. Það er allt útlit fyrir að Davíð sé að mæta Golíat á nýjan leik. Við vitum hvernig fyrri viðureignin fór. Endurtekur sagan sig eða eru nýir tímar?