Hart var sótt að Degi í umræðuþætti Ríkissjónvarpsins í gærkvöldi og snerust umræðurnar að miklu leyti um húsnæðismálin og samgöngumál. Borgarstjóranum var mjög heitt í hamsi og fullyrti meðal annars: „Við erum á miðju stærsta uppbyggingarskeiði í sögu borgarinnar.“ Þá gagnrýndi hann Sjálfstæðisflokk og Framsóknarflokk fyrir að leggja niður verkamannabústaðakerfið. Aðrir gagnrýndu borgarstjórann og meirihlutann fyrir að bregðast seint og illa við þeim skorti sem blasti við og hann gæti ekki dregið aðra til ábyrgðar.
Samfylkingin hefur mælst stærsti flokkurinn í flestum undanförnum könnunum, þar á meðal könnun Fréttablaðsins sem birtist í gær. Þar var flokkurinn með 32,1 prósent fylgi, níu fulltrúa og núverandi meirihluti traustur í sessi.
Samkvæmt könnun Gallup sama dag myndi meirihlutinn aftur á móti falla og þar fékk Samfylkingin aðeins 26 prósent og sjö fulltrúa.
