Tæplega 4 af hverjum 10 Svíum telja að taka eigi við mun færri flóttamönnum en nú er gert. Þetta eru tvöfalt fleiri en voru þessarar skoðunar 2015. Þegar flóttamannastraumurinn til Evrópu var í hámarki 2015 töldu 2 af hverjum 10 Svíum að herða þyrfti lög og reglur er varða flóttamenn og móttöku þeirra. 26 prósent vildu þá opna hliðin enn betur og gera enn betur við flóttamenn.

En nú hefur staðan breyst og það þrátt fyrir að Svíar hafi hert reglurnar töluvert. Mun færri flóttamenn leita nú til Svíþjóðar en samt sem áður telja 4 af hverjum 10 að taka eigi á móti mun færri flóttamönnum. Þá sögðu 19 prósent aðspurðra að þeir vilji taka á móti aðeins færri flóttamönnum. Þetta kemur fram í nýrri könnun sem var gerð fyrir Dagens Nyheter. Aðeins 12 prósent vilja rýmri löggjöf á þessu sviði.

39 prósent telja að það gangi mjög illa að aðlaga innflytjendur að sænsku samfélagi en 2015 voru 19 prósent þessarar skoðunar. 7 prósent telja að aðlögunin gangi vel.

Dagens Nyheter hefur eftir Marie Demker, stjórnmálafræðiprófessor við Gautaborgarháskóla, að þetta sé mikil breyting á skömmum tíma.

David Ahlin, hjá Ipsos sem sá um gerð könnunarinnar, segir að líta verði á niðurstöðurnar í evrópsku samhengi. Fólk setji nú spurningarmerki við frjálsa för fólk og rétt hælisleitenda. Vindarnir blási nú í þjóðernissinnaðar áttir og það hafi áhrif á fólk.