Klukkan 9.30 að staðartíma hefjast réttarhöldin yfir Peter Madsen á nýjan leik hjá undirrétti í Kaupmannahöfn. Madsen er ákærður fyrir að hafa orðið sænsku fréttakonunni Kim Wall að bana um borð í kafbátnum Nautilus í ágúst á síðasta ári. Hann er einnig ákærður fyrir að hafa hlutað lík hennar í sundur og að hafa brotið gegn henni kynferðislega á annan hátt en að nauðga henni.
Dagurinn í dag er ætlaður undir yfirheyrslu yfir Madsen og byrjar dagurinn með því að saksóknarinn í málinu, Jakob Buch-Jepsen, yfirheyrir Madsen. Því næst tekur verjandi Madsen, Betina Hald Engmark, við.
Sérfræðingur Danska ríkisútvarpsins segir að það sem fólk eigi helst að veita athygli í réttarhöldunum í dag sé hvort Madsen neiti að hafa orðið Wall að bana og hvernig hann útskýrir af hverju hann stakk hana margoft með hníf. Ákæruvaldið telur að það hafi hann gert á meðan Wall var á lífi en því hafnar Madsen.
Á fyrsta degi réttarhaldanna, þann 8. mars síðastliðinn, sagði Madsen að Wall hefði látist um borð í kafbátnum eftir að óhapp varð með útblástur frá vél hans og hafi hún látist af völdum eitraðra lofttegunda. Hann neitaði að hafa orðið henni að bana en játaði að hafa hlutað lík hennar í sundur til að geta hent líkinu í sjóinn.
Madsen neitar að hafa brotið gegn Wall kynferðislega. Til að hann verði sakfelldur fyrir þann lið ákærunnar þarf ákæruvaldið að sanna að Madsen hafi stungið Wall á meðan hún var á lífi en hann er meðal annars ákærður fyrir að hafa valdið áverkum á kynfærum hennar með hnífi. Það skiptir því miklu máli hversu langur tími leið frá því að Wall lést og þar til Madsen segir að hann hafi byrjað að stinga hana og skera.
Þegar verjandi Madsen tekur við þá má reikna með að hún muni reyna að fá Madsen til að vera trúverðugan fyrir rétti en það getur reynst á brattan að sækja því hann hefur breytt framburði sínum þrisvar sinnum. Auk þess er niðurstaða geðrannsóknar á honum sú að hann sé sjúklegur lygari.
Þar sem réttarmeinafræðingar hafa ekki getað slegið dánarorsök Wall fastri mun verjandi Madsen reyna að fá réttinn til að fallast á að nýjasta frásögn Madsen þar um sé rétt.
Réttarhöldunum verður síðan haldið áfram á morgun og föstudag en þá verða vitni yfirheyrð. Á morgun kemur réttarmeinafræðingur fyrir dóminn. Því næst er það unnusti Kim Wall sem ber vitni og þar á eftir konur, sem Madsen bauð í siglingar í kafbátnum, einnig munu ástkonur Madsen bera vitni. 37 vitni munu koma fyrir dóminn að öllu óbreyttu. Vitnaleiðslum verður framhaldið í næstu viku og eftir páska. Þann 23. apríl munu saksóknari og verjandi flytja lokaræður sínar og leggja málið í dóm. Reiknað er með að dómur verði kveðinn upp þann 25. apríl.