32 ára karlmaður var handtekinn í gær í TEC menntasetrinu í Hvidovre í Kaupmannahöfn. Tilkynnt hafði verið um grunsamlega hegðun mannsins og að hann væri með eitthvað sem líktist skammbyssu. Lögreglan brást skjótt við tilkynningunni og handtók manninn. Hann reyndist vera með skammbyssu og skotfæri meðferðis.

Í tilkynningu frá lögreglunni í Kaupmannahöfn kemur fram að maðurinn verði færður fyrir dómara í dag þar sem gæsluvarðhalds verður krafist yfir honum. Lögreglan hefur ekki viljað segja mikið um málið annað en að handtakan hafi gengið vel og átakalaust fyrir sig. Nú sé verið að rannsaka málið betur en á þessu stigi þess bendi ekkert til að maðurinn hafi ætlað að nota byssuna í skólanum.