Upp úr klukkan ellefu í gærkvöld var tilkynnt um rán í Tryggvagötu í Reykjavík. Ungum manni var ógnað með hnífi og hann krafinn um peninga og síma. Gerendur eru sagðir vera tveir menn sem náðu að hlaupa á brott með þýfið. Málið er í rannsókn.

Þetta kemur fram í dagbók lögreglunnar. Það segir einnig frá atviki í Mosfellsbæ sem dró dilk á eftir sér. Tilkynnt var um partýhávaða í húsi um hálftvöleytið. Tveir menn voru handteknir á vettvangi, annar er eftirlýstur fyrir brot á skilorði en hinn fór ekki að fyrirmælum lögreglu á vettvangi. Mennirnir voru vistaðir fyrir rannsókn málsins í fangageymslu lögreglu.

Allmargir ökumenn voru stöðvaðir í nótt á höfuðborgarsvæðinu grunaðir um ölvun eða að vera undir áhrifum fíkniefna.