Á föstudag fundust fimm vannærðir kettlingar í pappakassa við ruslatunnur á Suðurnesjum. Læðan, móðir þeirra, fannst skammt frá pappakassanum. Köttunum var bjargað í Kattholt þar sem þeir tóku hraustlega til matar síns.
Mikill fjöldi villtra og yfirgefinna katta er hýstur í Kattholti og fólki gefst kostur á að taka að sér ketti þaðan. Í Facebook-færslu Kattholts um kettina sex sem bjargað var á föstudag segir orðrétt:
Í dag komu yfirgefnir og vannærðir kettir í Kattholt, læða með fimm kettlinga. Kettlingarnir fundust í pappakassa við ruslatunnur á Suðurnesjum. Læðan fannst skammt frá kassanum. Kettirnir voru sársvangir og tóku hraustlega til matar síns við komu í athvarfið. Kettlingarnir eru smáir miðað við aldur og munu þurfa að fá aukalega pela til að byrja með.
