Ungar stúlkur sem héldu tombólu við Bónus í Hafnarfirði urðu vitni að grófri líkamsárás á tónlistarmann sem spilaði á harmonikku við verslunina.

Að þeirra sögn kom maður út úr bíl, mundaði golfkylfu og réðst á nikkarann. Hann lét svo höggin dynja á tónlistarmanninum. Stúlkunum er skiljanlega brugðið. Atvikið átti sér stað á þriðja tímanum í dag.

Sævar Guðmundsson, aðalvarðstjóri í Hafnarfirði, segist í samtali við DV lítið geta sagt annað en að lögreglu hafi borist tilkynning um líkamsárás og tveir bílar hafi verið sendir á vettvang.

Heimildarmaður sem DV ræddi við lét að því liggja að árásin tengdist hugsanlega einhverskonar uppgjöri. Maðurinn hefði verið að spila á yfirráðasvæði árásarmannsins eða -mannanna. Lögregla gat þó ekki staðfest þetta í samtali við DV.