Alls sóttu 3.930 nemendur um skólavist í framhaldsskólum landsins fyrir næstu önn en níu af hverjum tíu nemendum sem skráðu sig í framhaldsskóla komust inn í þá skóla sem þeir vildu helst. Frá þessu er greint á veg Menntamálastofnunnar.
Líkt og undanfarin ár gafst nemendum kostur á að sækja um tvo skóla og fengu 89% umsækjenda skólavist í þeim skóla sem þeir völdu sér í fyrsta vali. Alls fengu 9% nemenda skólavist í þeim skóla sem þeir völdu sér í öðru vali. 65 nemendur fengu ekki skólavist í þeim skólum sem þeir höfðu óskað eftir og sá Menntamálastofnun um að útvega þeim skólavist í þriðja skóla.
Flestar umsóknir bárust til Verslunarskóli Íslands, Menntaskólans við Hamrahlíð og Menntaskólans við Sund þetta árið. Flestir nemendur sóttust eftir því að komast inn á bóknáms- eða listnámsbrautir til stúdentsprófs eða 69% þeirra sem sóttu um. Um 16% nemenda innrituðust á verk- eða starfsnámsbrautir.