Myndbandsbloggarinn Nuseir Yassin, eða Nas Daily, birtir á síðu sinni myndband um verðlag á Íslandi. Tekur hann systur sína, Naya, sem dæmi um ferðamann sem eyðir 20 klukkustundum hér á landi. Hún er með 300 dollara, eða rúmar 30 þúsund krónur, inni á bankareikningnum sínum og uppgötvaði það að veran hér á landi geri hana blanka.
„Hún tók rútu til að sjá borgina. 40 dollarar. Hún fékk sér hádegismat. 30 dollarar. Hana langaði í föt… Ó… Það er allt of dýrt,“ segir Nas. Hún þurfi svo að borga 100 dollara til að fara í Bláa lónið. Til að kaupa ódýran mat þá þurfi hún að borga 4 dollara fyrir gos, 6 dollara fyrir gos og 12 dollara fyrir ber. „Þetta eru venjuleg verð hérna.“
Þetta segir Nas vera ástæðuna fyrir því að Ísland sé eitt dýrasta land í heimi fyrir ferðamenn. „Þar sem 20 klukkutíma stopp getur gert þig gjaldþrota.“ Gerir hann svo grín að dósunum með íslensku lofti sem seldar eru ferðamönnum.
Nú þegar hefur 1,5 milljón manns séð myndbandið og eru margir netverjar forviða á verðlaginu á Íslandi. Miðað við orð sumra virðist myndbandið hafa orðið til þess að sumir vilja ekki heimsækja Ísland. Segir Haseeb Alam Orakzai til dæmis að „þetta hafi slökkt í áhuganum á þessu landi.“
Nas er búinn að gera nokkur myndbönd um Ísland, þar á meðal um tómatarækt sem 2,3 milljónir hafa séð og um byssueign landsmanna sem 1,7 milljón hafa séð. Hér má sjá myndband hans um okur á Íslandi:
