Sveitastjórn Mýrdalshrepps hefur gengið frá samkomulagi við Þorkel Ingimarsson um að hann láti af störfum sem skólastjóri Víkurskóla þann 1. júní næstkomandi. Þessi ákvörðun byggist á sálfræðiúttekt á líðan starfsfólks í skólanum. Talsverð ólga hefur verið í skólanum undanfarna mánuði.

Þetta kemur fram í tilkynningu á vef Mýrdalshrepps þar sem segir: „Í kjölfar þess að upp kom í samfélaginu nú á vormánuðum talsverð ólga sem tengdist Víkurskóla. Ákvað sveitarstjórn Mýrdalshrepps að láta gera sálfélagslega úttekt á líðan starfsfólks í skólanum. Niðurstaða sveitarstjórnar eftir yfirferð þeirrar úttektar var sú að ekki yrði hjá því komist að breyta um yfirstjórn í skólanum. Gengið hefur verið frá samkomulagi við Þorkel Ingimarsson um að hann láti af störfum sem skólastjóri 1. júní 2018 og hefur sveitarstjóra verið falið að auglýsa eftir skólastjóra og kennara við skólann.“

Ásgeir Magnússon, sveitarstjóri Mýrdalshrepps, segir í samtali við Fréttablaðið að óánægja hefði verið með ákveðna þætti hjá yfirstjórn skólans. Að öðru leyti vildi hann ekki tjá sig um málið.