Samningur náðist við Sjúkratryggingar Íslands og var hann sendur þaðan til ráðuneytisins til samþykktar. „Áttum við von á að það yrði klárað strax eftir páska, en þaðan hefur hvorki heyrst hósti né stuna og virðist vera eins og að það á ekkert að skoða þetta fyrr en samningar hafa náðst í kjarabaráttu ljósmæðra,“ segir ljósmóðir á LSH, sem starfar sjálfstætt í heimaþjónustu, í samtali við DV.
„Þetta bitnar auðvitað fyrst og fremst á nýbökuðum foreldrum og meðgöngu- og sængurlegudeild LSH.“
95 ljósmæður eru á lista yfir heimaþjónustuljósmæður, en þær eru ekki allar starfandi. Tæplega 60 ljósmæður eru búnar að taka sig af listanum og taka ekki að sér heimaþjónustu fyrr en samningar verða undirritaðir.
„Þetta er auðvitað grafalvarlegt fyrir foreldra og gríðarlega kostnaðarsamt fyrir spítalann að hafa sængurkonur inniliggjandi í 4-5 daga þar sem að ekki er neitt um heimaþjónustu.“
