Í ágúst 2016 var Fardous El-Sakka fengin til að leysa af við kennslu í listaskóla í Helsingborg í Svíþjóð. Hún hafði áður kennt þar og var því ekki alveg ókunnug í skólanum. Hún er múslimi og af trúarlegum ástæðum vill hún ekki heilsa karlmönnum með handabandi. Þegar karlkyns samstarfsmenn hennar réttu fram hönd til að heilsa henni lagði hún hönd á hjarta sér og hneigði sig.
„Flestir virtu þetta og skildu að þótt ég heilsaði á þennan hátt þá kom það ekki í veg fyrir að ég gæti sinnt starfi mínu.“
Þetta skrifaði El-Sakka í kæru sem hún sendi umboðsmanni jafnréttismála eftir að einn samstarfsmaður hennar hafði kvartað við rektor listaskólans. Samstarfsmaður El-Sakka var ósáttur við að hún vildi ekki taka í hönd hans. í samtali við Kvällsposten sagði Lidija Münchmeyer, rektor, að manninum hafi fundist El-Sakka mismuna honum. Hún hafi því kallað El-Sakka á sinn fund og hafi hún staðfest þar sem maðurinn hafði sagt um samskipti hennar.
„Þetta er skóli sem gerir engan greinarmun á fólki eða kemur fram við það á mismunandi hátt. Þetta er það sem við leggjum fyrir nemendur okkar og við starfsfólkið verðum líka að fylgja þessu.“
El-Sakka valdi að ljúka samtalinu við rektor og yfirgefa skrifstofu hennar. Tveimur dögum síðar var frekari kennslu á hennar vegum aflýst og hún fékk ekki fleiri verkefni í skólanum.
EL-Sakka var ósátt og stefndi skólanum fyrir vinnurétt og krafðist 120.000 sænskra króna í bætur þar sem henni hefði verið mismunað þar sem hún neitaði að taka í hönd karlmanns af trúarlegum ástæðum. Dómstóllinn kvað upp dóm í gær og hafnaði kröfum El-Sakka með öllu. Dómstóllinn komst að þeirri niðurstöðu að stjórnendur skólans hafi brugðist rétt við í málinu.
Í umfjöllun Expressen um málið segir að þetta sé fyrsta málið þessarar tegundar sem er tekið fyrir hjá vinnuréttinum en hann er æðsta dómsstigið í málum er varða atvinnuréttindi.
Í þessu máli var aðallega tekist á um hvort það hefði verið El-Sakka sem valdi að hætta kennslu eða hvort skólinn hefði neytt hana til þess. Vinnurétturinn komst að þeirri niðurstöðu að það hefði verið El-Sakka sem valdi sjálf að hætta því hún hafi yfirgefið fundinn með rektor og hafi því ekki lagt sitt af mörkum til að hægt væri að leysa málið.