Donald Trump, Bandaríkjaforseti, hefur þegið boð Kim Jong-un, einræðisherra í Norður-Kóreu, um að hitta hann og funda með honum á næstu vikum. Sendinefnd frá Suður-Kóreu, sem fundaði með Kim Jong-un í Norður-Kóreu, í síðustu viku kom til Bandaríkjanna í gær og fundaði með bandarískum embættismönnum. Sendinefndin hafði meðferðis fundarboð frá Kim Jong-un til Trump og tók Trump því að sögn vel og lýsti sig strax reiðubúinn til að funda með Jong-un.
Fundurinn á að fara fram í apríl eða maí. Chung Eui-yong, þjóðaröryggisráðgjafi Suður-Kóreu, skýrði frá þessu á fréttamannafundi við Hvíta húsið í gær og skömmu síðar staðfesti talsmaður Trump þetta og gat þess að öllum viðskiptaþvingunum verði viðhaldið þar til samningar hafa náðst.
Í skilaboðunum frá Jong-un kom fram að hann „hlakki til að hitta Trump eins fljótt og hægt er“. Einnig gerði Kim Jong-un það ljóst að Norður-Kórea muni láta af öllum tilraunum með kjarnorkuvopn og eldflaugar á meðan á samningaviðræðum stendur. Það gildir einnig í næsta mánuði þegar Suður-Kórea og Bandaríkin halda sameiginlega heræfingu í Suður-Kóreu en venjulega hafa Norður-Kóreumenn sýnt mátt sinn þegar slíkar æfingar standa yfir og gert tilraunir með eldflaugar.
Trump tísti að sjálfsögðu um þetta í gærkvöldi og sagði að í viðræðum sínum við sendinefndina frá Suður-Kóreu hafi Kim Jong-un sagt að hann vilji semja um afvopnun og að Kóreuskaginn verði kjarnorkuvopnalaus.