Hljómsveitarmeðlimir grunaðir um skattalagabrot
Eignir meðlima hljómsveitarinnar Sigur Rósar hafa verið kyrrsettar af Sýslumanninum á höfuðborgarsvæðinu vegna gruns um skattalagabrot. Kyrrsetningin nær til eigna upp á rúmlega 800 milljónir króna, þar á meðal fasteignir, ökutæki, hlutafé í fyrirtækjum og fé á bankareikningum sem nær til allra þriggja meðlima hljómsveitarinnar, þeirra Jóns Þórs Birgissonar, Orra Páls Dýrasonar og Georgs Hólm. Greint er frá þessu í Fréttablaðinu í dag.
Hæsta krafan er á Jón Þór, best þekktur sem Jónsi í Sigur Rós, upp á 638 milljónir. Meðal eigna Jónsa sem voru kyrrsettar eru þrettán húseignir, tveir bílar, tvö mótorhjól, sex bankareikningar og hlutafé í þremur fyrirtækjum.
Kröfurnar á hina tvo meðlimina voru öllu lægri. Tvær fasteignir metnar á 82 milljónir í eigu Orra Páls og tvær fasteignir metnar á 78,5 milljónum í eigu Georgs Hólm.
Allir þrír hafa mótmælt kyrrsetningunni og segja að hún sé handvömm endurskoðanda en ekki ásetning. Ekki er heimilt að kyrrsetja eignir fyrir meira en fjárhæðina sem gert er kröfu um og því má gera ráð fyrir að meint skattaundanskot nemi mörg hundruð milljónum krónum.