Ítalski fréttamaðurinn Marco Brancaccia, sem er fyrrverandi tengdasonur Jóns Baldvins Hannibalssonar, er í breskum fjölmiðlum sagður áreita leikarann Colin Firth og eiginkonu. Brancaccia stóð í harðri forræðisdeilu við Snæfríði heitna Baldvinsdóttur fyrir ríflega tíu árum vegna dóttur þeirra tveggja.

Svo harðar voru þær deilur að Jón Baldvin fullyrti að Brancaccia hafi hótað að drepa hann og eiginkonu hans, Bryndísi Schram. Ítalinn höfðaði mál gegn Jóni Baldvini og voru ummælin dæmd dauð og ómerk. „Það síðasta sem ég heyrði frá Marco var að ef hann fengi ekki að sjá barnið myndi hann koma til Finnlands og myrða föður Snæfríðar og móður,“ voru ummæli Jóns Baldvins, sem dómari taldi ósönnuð.

Miðað við þessa reynslu ætti leikarinn ástsæli, Colin Firth, mögulega að leita ráða hjá Jóni Baldvini. Breska dagblaðið The Times greindi frá því í gær að lögregla á Ítalíu rannsakaði nú ásakanir eiginkonu Colins Firth, Liviu Giuggioli, um að Brancaccia væri að hrella hana. Brancaccia er sagður æskuvinur Giuggioli en eitthvað virðist hafa slest upp á vinskapinn.

Hann er sagður hafa hótað henni ítrekað bæði í síma og skilaboðum. Auk þess saka hjónin Brancaccia um að hafa sent ljósmyndir til Firths, en það virðist hafa verið kornið sem fyllti mælinn því í kjölfarið hafði leikarinn samband við saksóknara á Ítalíu. The Times greinir frá því að yfirvöld á Ítalíu hafi lagt hald á bæði tölvu og síma Brancaccia.