55 fermetra íbúð í Fossvogshverfi býðst áhugasömum til leigu frá 1. mars. Athygli vekur að leiguverðið er afar hátt miðað við stærð íbúðarinnar, eða 220 þúsund krónur á mánuði. Það gerir fjögur þúsund krónur á fermetrann.
Við nánari athugun kemur þó í ljós að fermetraverð er í takt við það sem gengur og gerist á þessu svæði. Á vef Þjóðskrár má finna töflu yfir meðalleiguverð á hvern fermetra í desember 2017 fyrir mismunandi stærðir íbúða og staðsetningu. Samkvæmt þeirri töflu er meðalleiguverð á hvern fermetra í Reykjavík, vestan Kringlumýrarbrautar og Seltjarnarnes, 4.052 krónur fyrir stúdíó íbúð. Til samanburðar má nefna að meðalverð á fermetra fyrir stúdíóíbúð er 3021 krónur í Kópvogi.
Það er Fasteignasalan Lind sem auglýsir íbúðina til leigu á vefsíðu sinni
Ekki kemur fram í auglýsingunni hvort hiti og rafmagn sé innifalið í leiguverðinu. Fram kemur að 1 svefnherbergi sé í íbúðinni og sameiginlegur inngangur. Frá stofunni er útgengi út á verönd. Þá er bankaábyrgð skilyrði fyrir leigunni auk þess sem væntanlegur leigjandi þarf að vera með hreina vanskilaskrá. Íbúðin er leigð út tímabundið til eins árs í einu.
Ítrekað hefur verið greint frá síhækkandi leiguverði á höfuðborgarsvæðinu undanfarin misseri en í nýrri skýrslu Íbúðalánasjóðs kemur þó fram að vísbendingar bendi til þess að leigumarkaður á Íslandi fari minnkandi Könnun meðal landsmanna, sem framkvæmd var í desember, bendir til þess að færri séu nú á leigumarkaði en í síðustu mælingu.
Tæplega 14 prósent þjóðarinnar eru nú á leigumarkaði, en í september var hlutfallið 17 prósent.
Í könnuninni var einnig spurt hvort svarendur teldu líklegt eða ekki að þeir yrðu á leigumarkaði eftir 6 mánuði. Niðurstöður leiddu í ljós að marktækt færri töldu líkur á að vera á leigumarkaði eftir hálft ár þegar spurt var í desember samanborið við þegar spurt var í september.
Í desember töldu 15 prósent þjóðarinnar líklegt að þeir yrðu á leigumarkaði eftir 6 mánuði sem er nokkuð svipað hlutfall og var þar á þeim tíma. Mikill meirihluti þeirra sem eru nú þegar á leigumarkaði, eða 83 prósent , telja líkur á að þeir verði þar áfram auk 18 prósent þeirra sem búa í foreldrahúsum. Þetta er svipuð hlutfallsleg skipting og mældist í september. Þá töldu 90 prósent þeirra sem voru á leigumarkaði líkur á að vera þar áfram auk 15 prósent þeirra sem voru í foreldrahúsum.
Í skýrslu Íbúðalánasjóðs kemur fram þessar niðurstöður megi túlka sem vísbendingu um að leigumarkaðurinn fari ef til vill áfram minnkandi. Fyrri kannanir bendi til þess að meirihluti leigjenda vilji kaupa sér íbúð, eða 80 prósent samkvæmt rannsókn sem Íbúðalánasjóður framkvæmdi meðal leigjenda síðastliðið haust.
Fasteignaverð hefur þó hækkað mikið upp á síðkastið og tekið fram úr tekjuþróun. Fólk á leigumarkaði á því er ðara með að safna sér fyrir útborgun í íbúð núna en áður og því er ekki víst hvort áform um minnkandi leigumarkað standist skoðun.