Laust fyrir miðnætti í gærkvöld var maður handtekinn í póstnúmeri 104 Reykjavík, grunaður um innbrot í heimahús. Maðurinn var vistaður fyrir rannsókn málsins í fangageymslu lögrelgu.
Þetta kemur fram í dagbók lögreglunnar. Þar segir einnig frá umferðarslysi á þriðja tímanum í nótt þar sem ekið var á gangandi konu í hverfi 108. Konan var flutt með sjúkrabíl á slysadeild en hún var með áverka eða aflögun á fæti.
Um fjögurleytið í nótt var maður handtekinn á veitingahúsi í miðbæ Reykjavíkur. Er maðurinn grunaður um ósæmilega hegðun en ekki kemur fram í dagbók lögreglu í hverju ósiðsemin var fólgin. Hann var vistaður fyrir rannsókn málsins í fangageymslu lögreglu.
Á tíunda tímanum í gærkvöld var maður handtekinn í Breiðholti, grunaður um yfirhylmingu, vörslu fíkniefna, brot á vopnalögum og fleira. Hann var vistaður fyrir rannsókn málsins í fangageymslu lögreglu.