Hæðst er að Donald Trump Bandaríkjaforseta á samfélagsmiðlum vegna myndbands sem virðist sýna að hann eigi í erfiðleikum með að syngja með bandaríska þjóðsöngnum. Trump var staddur á ruðningsleik milli Alabama og Georgíu í gærkvöldi þegar myndbandið var tekið.
Gagnrýnendur Trump hafa bent á að hann sjálfur hafi gagnrýnt ruðningsleikmenn fyrir að standa ekki þegar þjóðsöngurinn er spilaður, gerðu þeir það til að sýna samstöðu með blökkumönnum í Bandaríkjunum. Skömmu fyrir leikinn í gær endurtók Trump gagnrýni sína. „Það er nægt rými fyrir fólk til að koma skoðunum sínum á framfæri og mótmæla, en við elskum fánann okkar og við elskum þjóðsönginn okkar og við viljum halda því þannig,“ sagði Trump á fundi með bændum í Nashville í gær.
Í myndskeiðinu heyrist ekki í Trump syngja en hann sést hreyfa varirnar. Vilja margir meina að hann kunni ekki allan textann. Dæmi nú hver fyrir sig.
