Gunnar Kristinn Þórðarson, fyrrverandi formaður Karlalistans, segist á Facebook-síðu sinni hafa kært Þóreyju Guðmundsdóttur og Elísabetu Ýr Atladóttur til lögreglu. Ástæðan er sögð ummæli sem þær létu falla í lokuðum Facebook-hóp. Elísabet Ýr segir í samtali við DV að hún hafi ekkert heyrt frá lögreglu og vilji því að svo stöddu ekki tjá sig um málið.
„Í dag átti ég fund með lögreglunni og lagði fram kæru á hendur sr. Þóreyju Guðmundsdóttur og Elísabetu Ýr Atladóttur. Ég kæri sr. Þóreyju fyrir brot á 229. gr. hegningarlaga, sem segir svo: „Hver sem skýrir opinberlega frá einkamálefnum annars manns, án þess að nægar ástæður séu fyrir hendi, er réttlæti verknaðinn, skal sæta sektum eða fangelsi allt að 1 ári.“ Að auki kærði ég sr. Þóreyju fyrir brot á 9. gr., sbr, 8. gr. og 8. ml. 2 gr. laga um persónuvernd. Ég kærði Elísabetu jafnframt fyrir brot á 121. gr. hegningarlaga, er segir svo: „Hver sem opinberlega hvetur menn til refsiverðra verka, skal sæta fangelsi allt að 2 árum eða sektum, ef málsbætur eru, nema brot hans varði þyngri refsingu að lögum“,“ skrifar Gunnar Kristinn.
Hann hefur áður sagt að Þórey Guðmundsdóttir, prestur, fyrrverandi sáttarfulltrúi sýslumanns og starfsmaður barnaverndar, hafi fullyrt í athugasemd að hafi hann eytt meirihluta uppvaxtar síns á Barna og unglingageðdeild Landspítalans. Hann segir að hið rétta sé sé hann hafi verið á BUGL í tvo mánuði.
„Þessi ákvörðun sr. Þóreyjar að draga fram 30 ára gamlar upplýsingar um geðheilsu 14 ára unglings sem hafði lent í grófu einelti vegna taugasjúkdóms, hafði meiri áhrif á mig en ég ætlaði. Eins og gengur með mörg börn sem verða fyrir áföllum, hafði ég gleymt mörgu frá þessum tíma, og hélt að það væri til marks um að ég hefði sleppt tökum á þessu tímabili í lífi mínu. Þegar sr. Þórey dró þessar upplýsingar fram, mér til áfellis og niðurlægingar, heltust yfir mig óvelkomnar minningar um einelti, barsmíðar og niðurlægingu. Ég fékk að auki mikla samkennd með þessum unglingi, sem mér fannst lengi, þekkja aðeins af afspurn,“ segir Gunnar Kristinn.
Hann segist hafa kært þær fyrir hönd þeirra sem þurfa að leita á BUGL: „Ég lagði fram kæruna fyrir hönd þessa unglings, sem ég vil nú þekkja betur, en einnig allra unglingsdrengja sem í dag þurfa að taka ákvörðun um hvort þeir eigi að þiggja þjónustu Barna og unglingageðdeildar Landspítalans. Ég hef verið í þeim sporum, og veit að eitt af því sem unglingar velta fyrir sér, er hvort slík ákvörðun muni elta þau fram á fullorðinsár. Ef ekkert verður að gert, -og þessi verknaður Þóreyjar og Elísabetar látinn óátalinn, geta þeir átt von á að embættismenn, -eins og sr. Þórey, -sem einnig hefur starfað sem heilbrigðisstarfsmaður, muni 30 árum síðar draga þær upplýsingar þeim til háðungar og áfellis.“
