Sérsveit lögreglunnar handtók einstakling sem var vopnaður hnífi í húsnæði við Þverholt 18 á dögunum. Samkvæmt heimildum DV var um að ræða egypskan hælisleitanda sem taldi sig hafa verið svikinn um laun af vinnuveitanda sínum, Já iðnaðarmönnunum. Hann freistaði þess að fá  launin greidd á skrifstofu fyrirtækisins en þegar það gekk ekki eftir þá dró hann vopnið á loft og hugðist leita hefnda. Atvikið var tilkynnt til lögreglu sem fór þegar á vettvang ásamt sérsveitinni og færði manninn í járn. Málið telst upplýst og má vænta þess að maðurinn verði ákærður fyrir brot sitt.

Í lok síðasta árs fjallaði DV um kennitöluflakk Já iðnaðarmanna í grein sem bar yfirskriftina „Sviðin jörð Jóhanns í Já iðnaðarmönnunum“. Nokkrum dögum fyrr hafði fyrirtækið verið úrskurðað gjaldþrota og námu kröfur um 126 milljónum króna en ekkert fékkst upp í þær. Eigandi Já iðnaðarmanna, Jóhann Ingólfsson, stofnaði þegar nýtt félag með annarri kennitölu og hélt rekstri verktakafyrirtækisins áfram eins og ekkert hefði í skorist. Sátu margir eftir með sárt ennið eftir viðskipti sín við Jóhann og sagði einn viðmælandi DV að hann hefði aldrei kynnst öðrum eins siðblindingja og Jóhanni.

Afbrotaferill Jóhanns er skuggalegur. Hann var fyrst dæmdur fyrir þjófnað árið 1975 og hefur hlotið á þriðja tug dóma fyrir margs konar brot, meðal annars nauðgun og fíkniefnainnflutning. Undanfarin ár hefur hann rekið hið umdeilda verktakafyrirtæki Já iðnaðarmenn. Sumarið 2017 tók Jóhann á leigu áðurnefnt húsnæði í Þverholti undir starfsemi sína. Auk þess að vera þar með skrifstofuaðstöðu hafa erlendir starfsmenn fyrirtækisins verið hýstir þar.