Erlendur karlmaður á fertugsaldri hefur verið dæmdur í fjögurra fangelsi en hann var meðal annars sakfelldur fyrir að hafa nauðgað þáverandi eiginkonu sinni og ítrekað sett sig í samband við hana þrátt fyrir nálgunarbann. Þá var maðurinn einnig sakfelldur fyrir að hafa á mánaðarlöngu tímabili horft á klámmyndir og fróað sér í viðurvist sonar síns. Dómur féll í Héraðsdómi Reykjaness þann 26.apríl síðastliðinn.
Ákæran á hendur manninum var í 11 liðum. Maðurinn var ákærður fyrir tilraun til nauðgunar, nauðgun og nauðgun og fyrir ítrekuð brot gegn nálgunarbanni. Þá var hann einnig ákærður fyrir brot á fjarskiptalögum með því að hafa komið fyrir GPS staðsetningartæki í bifreið konunnar, án hennar vitundar.Þá var maðurinn ákærður fyrir blygðunarsemis og barnaverndarlagabrot gegn syni þeirra.
Fram kemur í dómnum að fjölskyldan sé erlendis frá. Þáverandi eiginkona mannsins leitaði fyrst á lögreglustöðina í Kópavogi þann 21.janúar 2016 og óskaði eftir aðstoð vegna endurtekinna ofbeldisbrota af hálfu eiginmanns síns, bæði gagnvart henni sjálfri og syni þeirra. Sagði hún ofbeldið hafa staðið yfir í mörg ár, en væri sérlega slæmt nú þar sem eiginmaðurinn væri ölvaður og búinn að vera það samfellt frá áramótum. Lýsti hún ofbeldinu sem andlegu, líkamlegu og kynferðislegu. Þá sagði hún manninnn jafnframt hafa lagt hendur á drenginn þeirra, rifið í hár hans og sparkað í magann á honum. Konan óskaði eftir aðstoð lögreglu og barnaverndaryfirvalda til að komast af heimilinu og var ákveðið að flytja hana, ásamt börnum hennar tveimur, í Kvennaathvarfið.
Rúmlega mánuði síðar leitaði konan aftur til lögreglu og lagði fram kæru á hendur manninum vegna kynferðisbrots og frelsissviptingar. Fram kemur í ákæru að maðurinn hafi ruðst inn í bifreið konunnar á bifreiðastæði við skóla í Kópavogi þar sem konan stundaði nám, og skipað henni að aka bifreiðinni að heimili þeirra. Þar hafi neytt hana til munnmaka og þvínæst meinað henni för skipaði henni að koma með sér í bifreiðina sem hann síðan ók um höfuðborgarsvæðið, uns hann ók konunni að lögreglustöðinni við Dalveg í Kópavogi þar sem hann hleypti henni út um kl. 17:40, en þá hafði konan verið svipt frelsi sínu í tæpar 6 klukkustundir.
Fyrir utan umrætt atvik var maðurinn einnig ákærður fyrir tilraun til nauðgunar þann 15.febrúar 2016 en fram kemur að nærbuxur konunnar hafi rifnað þegar hún reyndi að streitast á móti manninum, og við það hafi hann hætt. Þá var hann ákærður fyrir að hafa nauðgað konunni viku síðar en fram kemur í ákæru að hann hafi tekið hana úr fötunum, snúið henni á magann og haldið höndum hennar á sama tíma og hann þröngvaði getnaðarlim sínum inn í leggöng hennar.
Þá sneru fimm liðir ákærunnar að brotum gegn nálgunarbanni en með ákvörðun lögreglustjórans á höfuðborgarsvæðinu frá 4. mars 2016 og úrskurði Héraðsdóms Reykjaness frá 10. mars sama ár var manninum bannað að setja sig í samband við konuna.
Engu að síður setti maðurinn sig ítrekað í samband við konuna næsta hálfa árið. Fram kemur í ákæru að á tímabílinu 23.apríl til 13.maí hafi hann hringt í símanúmer konunnar í 848 skipti. Á tímabilinu 1.júní til 1.september hringdi hann alls 102 sinnum í tvö símanúmer konunnar og sendi sömuleiðis 64 sms skilaboð. Jafnframt nálgaðist hann konuna og son þeirra fyrir Kvennaathvarfið þann 9.maí sama ár. Þremur dögum síðar veitti hann konunni eftirför á bifreiðastæði við Hótel Nordica við Suðurlandsbraut í Reykjavík, nálgaðist hana og gerði ilraun til að opna dyr bifreiðarinnar sem hún ók.
Þá var maðurinn ákærður fyrir að hafa látið þjónustuaðila koma fyrir eftirfararbúnaði og GPS staðsetningartæki af gerðinni Scope í bifreið konunnar í þeim tilgangi að fylgjast með ferðum hennar á tímabilinu 22. febrúar til og með 16. júní en öllum upplýsingum um akstur bifreiðarinnar var safnað saman á læstan aðgang á vefsvæði, sem aðeins maðurinn og einn annar aðili höfðu aðgang að.
Þá var maðurinn ákærður fyrir að hafa ítrekað á tímabilinu 31. desember 2015 til 31. janúar 2016 horft á klámmyndir og fróað sér í viðurvist sonar síns. Fram kemur í ákæru að með þessari háttsemi hafi hann sært blygðunarsemi barnsins og sýnt af sér ruddalegt og ósiðlegt athæfi gagnvart barninu ásamt því að ógna heilsu og velferð þess.
Maðurinn játaði brot gegn nálgunarbanni og fjarskiptalögum en neitaði öðrum liðum ákærunnar.
Hann var sakfelldur fyrir eina nauðgun gegn konunni, auk blyðgunarsemis- og barnaverndarlagabrots gagnvart syni sínum en líkt og fyrr segir játaði hann ítrekuð brot gegn nálgunarbanni og brot á fjarskiptalögum.
Hann var ekki sakfelldur fyrir tilraun til nauðgunar en fram kemur í dómnum að ákærði og brotaþoli séu ein til frásagnar um það sem gerðist umrætt sinn og standi þar orð gegn orði. Hann var einnig sýknaður af öðrum lið ákærunnar sem sneri að nauðgun þann 22. Febrúar en fram kemur í dómi:
„Af þessum orðum brotaþola verður ekki annað ráðið en að brotaþoli hafi látið til leiðast og fallist á kynmökin þótt henni hafi verið það óljúft. Alltént verður að teljast ósannað að ákærði hafi haft ásetning til þess að þvinga brotaþola til kynmaka með þeim verknaðaraðferðum sem lýst er í þessum ákærulið. Að því virtu verður ákærði sýknaður af þeirri háttsemi sem honum er þar gefin að sök.“
Hæfileg refsing á hendur manninum var talin vera 4 ára fangelsi auk þess sem honum er gert að greiða fyrrverandi konu sinni 1,6 milljónir króna í miskabætur.
