Á heitum maídegi á síðasta ári voru tvö börn Cynthia Randolph, 25 ára, frá Parker County í Texas í Bandaríkjunum að leik í bíl hennar. Þegar börnin, sem voru tveggja og eins árs, neituðu að koma með henni inni ákvað hún að kenna þeim ákveðna lexíu. Hún læsti bílnum og fór inn í húsið. Hún taldi að tveggja ára dóttir hennar væri nægilega þroskuð til að geta komist út úr bílnum upp á eigin spýtur og gæti tekið bróður sinn með.

Cynthia fór inn og reykti marijúana og horfði á Keeping Up With the Kardashians í sjónvarpinu. Síðan fékk hún sér blund. Forth Worth Star-Telegram skýrir frá þessu.

Þegar hún vaknaði eftir tvo til þrjá tíma að eigin sögn fór hún út til að athuga með börnin voru þau enn í bílnum. Hún náði engu sambandi við þau og þau voru úrskurðuð látin skömmu síðar. Cynthia braut rúðu í bílnum til að reyna að láta þetta allt líta út eins og slys.

Dómur var kveðinn upp yfir henni á mánudaginn og var hún dæmd í samtals 40 ára fangelsi.

Krufning leiddi í ljós að börnin létust af völdum hita. Þennan dag var 35 stiga hiti og talið er að hitinn inni í bílnum hafi náð allt að 60 gráðum.

Cynthia varð margsaga í yfirheyrslum og fyrir dómi og sagði meðal annars að börnin hefðu stungið af frá henni og að hún hefði síðan fundið þau inni í bílnum. Fyrir dómi voru sýndar 13 klukkustundir af margbreytilegum framburði hennar.