Um fátt hefur verið meira rætt í Bandaríkjunum en handtöku hins 72 árs gamla Joseph James DeAngelo, 72 ára fyrrverandi lögregluþjóns, sem grunaður er um að vera einn afkastamesti raðmorðingi Bandaríkjanna í seinni tíð.
Joseph þessi er grunaður um að hafa drepið tólf manns, nauðgað rúmlega fimmtíu konum og framið á annað hundrað innbrot á árunum 1976 til 1986. Það sem vakið hefur athygli margra er sú staðreynd að Joseph virðist hætt að fremja hina hryllilegu glæpi árið 1986. Engar vísbendingar eru um að hann hafi endurtekið leikinn, eða í rúm 30 ár. Það er í hróplegri mótsögn við þá útbreiddu skoðun að raðmorðingjar og raðnauðgarar geti ekki hætt að stunda glæpi sína.
Í umfjöllun New York Times um málið er þó haft eftir sérfræðingum, réttarsálfræðingum og fulltrúum FBI þar á meðal, að þetta sé mýta – dæmi séu um að menn hætti skyndilega að fremja voðaverk sín.
„Þetta eru ekki gjörðir (morð og nauðganir) sem þessir einstaklingar telja sig skuldbundna til að framkvæma. Þær eru viljandi og skipulagðar,“ segir J. Reid Meloy, réttarsálfræðingur og sálfræðiprófessor við University of California, í samtali við New York Times.
En hvers vegna hætta raðmorðingjar og raðnauðgarar skyndilega að fremja glæpi sína, jafnvel eftir að hafa stundað iðju sína svo árum, jafnvel áratugum, skiptir? Tölfræðideild Bandarísku alríkislögreglunnar framkvæmdi umfangsmikla rannsókn á þessu árið 2008. Teknar voru saman upplýsingar um raðmorðingja í bandarískri réttarsögu og í niðurstöðunum kom fram að ýmis tímamót í lífi þessara einstaklinga hafi talsverð áhrif; hjónabönd og barneignir þar á meðal. Þá geti aðrar breytingar haft áhrif; flutningar, atvinna og fleira til.
Í þessu samhengi er nefnt mál raðmorðingjans Dennis Rader, sem myrti tíu manns á árunum 1974 til 1991. Hann var ekki handtekinn fyrr en árið 2005 og þá höfðu fjórtán ár liðið frá síðasta voðaverki hans. Rader viðurkenndi síðar að hafa beint hvötum sínum í annan jarðveg, ef svo má segja – hann fann eitthvað annað til að fullnægja hvötum sínum en að myrða einstaklinga.
Þá er einnig nefnt annað dæmi af raðmorðingjanum Gary Ridgeway. Ridgeway myrti vændiskonur meðan á fyrstu tveimur hjónaböndum hans stóð. Þegar hann kvæntist þriðju konunni – og virtist vera í hamingjuríku sambandi – hættu morðin.
Bandarísk yfirvöld hafa ekki gefið mikið út varðandi mál Joseps DeAngelo, sem nú er í deiglunni. Sérfræðingar gefa þó til kynna og benda á að árið 1986 hafi hann verið orðinn fertugur. Um það leyti fer framleiðsla testósteróns í líkamanum minnkandi og það geti vissulega haft áhrif. Þetta er að minnsta kosti mat Michael H. Stone, prófessors í réttarsálfræði við Columbia University. Michael hefur stundað rannsóknir á raðmorðingjum um margra ára skeið.
Los Angeles Times bendir á að Joseph hafi eignast dóttur árið 1981 og í kjölfarið hafi hann, að því er virðist, dregið sig í hlé í fimm ár.
