Á fimmtudag, þann 19. apríl, voru liðin tíu ár síðan upp komst um skuggalegt leyndarmál Austurríkismannsins Joseph Fritzl.
Fritzl var dæmdur í lífstíðarfangelsi fyrir að halda dóttur sinni, Elizabeth, fanginni í kjallara á heimili sínu í 24 ár. Hann nauðgaði henni mörg þúsund sinnum og varð hún barnshafandi minnst sjö sinnum.
Fritzl, sem er orðinn 83 ára, situr enn á bak við lás og slá í Krems-Stein-fangelsinu, einu rammgerðasta fangelsi landsins. Heilsu hans er farið að hraka og er hann sagður vera farinn að sýna merki um elliglöp, að því er fram kemur í umfjöllun breska blaðsins Mirror.
Þar segir að Fritzl hafi fyrstu árin eytt dögunum í fangelsinu meðal annars með því að sinna starfi umsjónarmanns bókasafns fangelsisins. Að undanförnu hafi hann séð um þrif í fangelsinu ásamt öðrum föngum.
Fritzl var dæmdur fyrir að nauðga dóttur sinni þrjú þúsund sinnum, en hann hélt henni innilokaðri í hljóðeinangruðu herbergi í 24 ár. Elizabeth eignaðist sjö börn meðan á þessu stóð, en eitt barnanna lést skömmu eftir fæðingu. Fritzl brenndi líkið í ofni.
Elizabeth er í dag 52 ára og hefur hún ekki haft nein samskipti við föður sinn síðastliðin tíu ár, eða síðan hún slapp úr dýflissunni á heimili þeirra. Hún hefur nú tekið upp nýtt auðkenni og býr á óþekktum stað í Austurríki ásamt börnunum sem hún eignaðist með föður sínum.
