Nauðsynlegt var að vísa Guðmundi Sævari Sævarssyni, hjúkrunardeildarstjóra og varaþingmanni Flokks fólksins, úr árlegri þingveislu sem haldin var á Hótel Sögu síðastliðinn föstudag. Þetta er fullyrt á vef Fréttablaðsins. Hann er sagður hafa verið blindfullur og áreitt þingkonur og maka þingmanna með óviðeigandi strokum og snertingum.
Í samtali við Fréttablaðið segja sjónarvottar að hann hafi ítrekað áreitt konur í veislusalnum. Að lokum fengu gestir nóg og var starfsmaður Hótel Sögu beðinn um að vísa honum út. Karl Gauti Hjaltason, þingmaður Flokks fólksins, sagðist í samtali við Fréttablaðið hafa heyrt „einhvern orðróm“ um málið.