Körfuknattleiksmaðurinn Tryggvi Hlinason, sem spilar með spænska liðinu Valencia hefur ákveðið að gefa kost á sér í nýliðaval NBA deildarinnar í sumar. Tryggvi, sem er miðherji og 216 sentimetrar á hæð, er ættaður úr Bárðardalnum í Suður Þingeyjasýslu og hóf að spila körfuknattleik árið 2014 með Þór á Akureyri. ESPN greinir frá þessu.
Tryggvi var í viðtali hjá DV í ágúst síðastliðnum og þar sagðist hann ekkert hafa stundað íþróttir að ráði sem barn heldur fengist við sveitastörfin. „Ég æfði aldrei körfubolta þótt ég hafi kannski skotið eitthvað smá á körfu í íþróttatímum. Ég hafði því aldrei æft skipulega neina íþróttagrein þegar ég flutti til Akureyrar og hóf námið. Ég fylgdist ekki einu sinni neitt sérstaklega með körfubolta, ég fylgdist með landsliðunum þegar verið var að sýna leiki í sjónvarpinu og helst handboltanum.“
Tryggvi stóð sig frábærlega á evrópumeistaramótinu undir 20 ára síðasta sumar. Þar skoraði hann 16 stig, tæplega 12 fráköst og varði 3 bolta að meðaltali í leik á 33 mínútum. Hann samdi við Valencia síðasta sumar en hefur ekki fengið að spila nægilega mikið með liðinu.
Núna er hann í 75. sæti á lista ESPN yfir 100 efnilegustu leikmenn heims. Búist er við því að hann verði valinn í annarri umferð nýliðavalsins.
