Laun Eggerts Þórs Kristóferssonar forstjóra N1 hækkuðu úr 4,8 milljónum á mánuði í 5,9 milljónir. Frá þessu var greint í Fréttablaðinu fyrr í vikunni og vakti sú frétt mikla athygli. Vilhjálmur Birgisson, formaður Verkalýðsfélags Akraness, bendir á í dag á Facebook-síðu sinni að Eggert er ekki eini forstjóri stórfyrirtækis sem hefur fengið himinháa launahækkun á síðustu mánuðum. Í þeim hópi eru einnig forstjóri Eimskips, Símans og Reita. Vilhjálmur segir:
Það er óhætt að segja að fréttir um að forstjóri N1 hafi hækkað um eina milljón á mánuði hafi vakið eðlilega mikla reiði hjá íslensku þjóðinni.
Í pistli sínum í dag bendir Vilhjálmur á aðra forstjóra sem hafa fengið gríðarlega launahækkun. Gylfi Sigfússon forstjóri Eimskips hækkaði um 700 þúsund á mánuði. Árslaun hans eru þá 102 milljónir í stað 94. Laun hans eru 8,6 milljónir á mánuði. Lífeyrissjóðir launafólks eiga um 44% í Eimskip. Vilhjálmur byggir tölur sínar á úttekt Morgunblaðsins en hann segir:
• Forstjóri N1 (Eggert Þór) hækkaði um 1 milljón á mánuði! (Árslaun 70,2 milljónir )
Lífeyrissjóðirnir eiga 52,9% í N1
• Forstjóri Eimskips (Gylfi Sigfússon) hækkaði um tæpar 700 þúsund á mánuði! (Árslaun 102,6 milljónir)
Lífeyrissjóðirnir eiga 44% í Eimskip
• Forstjóri Símans, (Orri Hauksson) hækkaði um 433 þúsund á mánuði! (Árslaun 48,2 milljónir)
Lífeyrissjóðirnir eiga 50,2% í Símanum
• Forstjóri Reita, (Guðjón Auðunsson) hækkaði um 400 þúsund á mánuði! Árslaun (44,4)
Lífeyrissjóðirnir eiga 57,4% í Reitum
Vilhjálmur kallaði launahækkun Eggerts sjálftöku og græðgi og benti á að það þyrfti 22 afgreiðslumenn á lágmarkstöxtum til að ná launum forstjórans. Enn fremur vakti Vilhjálmur athygli á því að N1 væri í um 50% í eigu lífeyrissjóða launafólks. Boðar hann því fordæmalaus átök á vinnumarkaði sem ekki hafa sást áður á íslenskum vinnumarkaði. Vilhjálmur sagði:
Ég vil tala tæpitungulaust við fulltrúa Samtaka atvinnulífsins, stjórnvalda og forsvarsmenn lífeyrissjóðanna: Þið skulið búa ykkur undir átök verkafólks sem ekki hefur sést á íslenskum vinnumarkaði áður. Þetta var kornið sem stútfyllti mælinn!
