Hug Hefner, stofnandi Playboy tímaritsins, er látinn 91 árs að aldri. Útgáfufyrirtæki hans, Playboy Enterprises, skýrði frá þessu á Twitter fyrir stundu. Þar kemur fram að Hefner hafi látist á heimili sínu af eðlilegum orsökum.
Hefner stofnaði Playboy 1953 og gerði blaðið að einu þekktasta tímariti samtímans í um hálfa öld. Blaðið lét mikið til sín taka í umfjöllun um kynlíf og nekt og var líklegast þekktast hjá mörgum fyrir nektarmyndir sem prýddu þær. Blaðið birti einnig greinar um íþróttir, kvikmyndir og sjónvarpsþætti, tónlist, stjórnmál, listir og kynlíf. Margir flokkuðu blaðið sem klámrit.
Nektarmyndir af Marilyn Monroe prýddu fyrsta eintak blaðsins en það seldist í rúmlega 50.000 eintökum.
Á síðari árum hefur Hefner helst ratað í fréttirnar fyrir lífsstíl sinn en hann bjó í Playboy höll sinni í Los Angeles þar sem hann var yfirleitt umkringdur léttklæddum konum í samkvæmum sem hann hélt. Sjálfur var hann oft í rauðum silkináttfötum, með pípu og umvafinn kvenfólki.