Lögreglan á höfuðborgarsvæðinu hafði hendur í hári tveggja karlmanna sem reyndu að stinga lögreglu af á tveimur jafnfljótum. Í dagbók lögreglu kemur fram að skömmu eftir klukkan eitt í nótt hafi lögreglumenn veitt leigubifreið eftirför sem sinnti ekki stöðvunarmerkjum.

Í bifreiðinni voru tveir karlmenn, ökumaður og farþegi, og stukku þeir út úr bifreiðinni og hlupu af vettvangi. Mennirnir fundust skömmu síðar og voru þeir handteknir og fluttir í fangamóttöku á Hverfisgötu. Að lokinni blóðtöku voru þeir vistaðir í fangageymslu og verða þeir yfirheyrðir síðar í dag.

Rétt eftir miðnætti var svo óskað eftir aðstoð í heimahús í austurbænum. Þar var kona í geðrofi ásamt því að hafa neytt einhverra fíkniefna. Ekki reyndist unnt að koma henni á geðdeild í þessu ástandi og því var ákveðið að vista hana í fangageymslu og verður henni komið undir læknishendur síðar í dag.

Á tólfta tímanum í gærkvöldi var tilkynnt um mann vera að skemma bifreið með hafnarboltakylfu á Bíldshöfða. Þegar lögregla kom á vettvang var tjónvaldur horfinn og er ekki vitað hver hann er. Bifreiðin er talsvert skemmd.