Nauðgari sem fær 5 og hálfs árs dóm farinn að rúnta um bæinn og á Tinder
„Hef enga trú á að því að nokkrum manni finnist eðlilegt að nauðgari sem fær 5 og hálfs árs dóm sé farinn að rúnta um bæinn og á Tinder hálfu ári eftir að hann var dæmdur,“ segir borgarfulltrúinn Guðfinna Jóhanna Guðmundsdóttir á Facebook-síðu sinni í morgun. Segir hún að Fangelsismálastofnun misbjóði réttarvitund fólks með ákvörðun sinni í máli Elvars Miles.
DV hefur undanfarið fjallað ítarlega um mál Elvars Miles en hann er nú laus úr fangelsi og er kominn í opið úrræði hjá Vernd í Laugardal aðeins hálfu ári eftir að hann hlaut 5 og hálfs árs dóm fyrir tvær hrottalegar nauðganir. Margir telja hættu á að Elvar nauðgi aftur og þolendum hans er misboðið með þessari ákvörðun Fangelsismálastofnunar.
Guðfinna Jóhanna er borgarfulltrúi hjá Framsókn og Flugvallarvinum en fyrir tveimur árum steig hún fram og ræddi um kynferðisofbeldi sem hún var beitt sem barn. Fyrir skömmu minntist hún þeirrar ákvörðunar og fjallaði Eyjan um það.
Guðfinna telur að mál Elvars gefi tilefni til að breyta lögum um Fangelsismálastofnun. Hún skrifar:
„Ef lögin eru þannig að Fangelsismálastofnun getur misboðið réttarvitund fólks með ákvörðunum sínum þá þarf að breyta lögunum.“
Í umræðum undir færslunni skrifar Guðfinna enn fremur:
„Ég er að tala um dónaskap og vanvirðingu Fangelsismálastofnunar og hvernig henni tókst að henda okkur aftur um áratugi í nauðgunarmálum með þessari ákvörðun sinni sem væntanlega hefur áhrif á að brotaþolar munu ekki kæra miðað við þessa framkomu.“