Fannst þrettán klukkustundum síðar
Um hádegisbil í gær hvarf sex ára stúlka frá fjölskyldu sinni nærri Blacksåsberget nærri Hudiksvall í Svíþjóð. Stúlkan fannst klukkan 1 í nótt, heil á húfi. Fjölmennt leitarlið hafði þá leitað hennar en hætta þurfti leitinni um tíma þar sem talið var að bjarndýr væri á leitarsvæðinu.
Sænska ríkisútvarpið skýrir frá þessu. Haft er eftir Johan Olsson, talsmanni lögreglunnar, að leitarhundar hafi fundið stúlkuna á svæði sem hafi verið talið líklegt að hún væri á. Stúlkan var á leið upp á Blacksåsberget um hádegisbil í gær ásamt fjölskyldu sinni þegar hún hvarf án þess að það uppgötvaðist strax.
Fjölskylda hennar hóf strax að leita að henni og gerði lögreglunni viðvart. Lögreglan sendi þyrlu, leitarhunda og sérþjálfaða leitarmenn á vettvang. Á þriðja hundrað manns komu að leitinni. Stúlkan fannst um 500 metra frá þeim stað þar sem síðast sást til hennar.
Hlé var gert á leitinni um tíma í gærkvöldi af ótta við að bjarndýr væri á svæðinu og voru sérþjálfaðir veiðimenn kallaðir til aðstoðar. Ekkert bjarndýr fannst hinsvegar á svæðinu og var því hægt að halda leitinni áfram.
Stúlkan er við góða heilsu. Hún var strax skoðuð af sjúkraflutningsmönnum og fór síðan í faðm foreldra sinna að sögn Aftonbladet.