Lögreglan á höfuðborgarsvæðinu vill ítreka varnaðarorð sín til þeirra sem íhuga að eiga viðskipti við vingjarnlega, erlenda sölumenn sem bjóða vandaðan fatnað til sölu á mjög hagstæðu verði, en grunur leikur á að varningurinn sé ekki í þeim gæðaflokki sem fullyrt er.
Fram kemur í tilkynningu frá lögreglunni á höfuðborgarsvæði að fyrr í dag hafi maður leitað til lögreglu og sagði hannfarir sínar ekki sléttar eftir viðskipti við tvo erlenda menn, en þeir seldu honum nokkra jakka eftir að hafa tekið hann fyrst tali á bifreiðastæði við banka í austurborginni.
Grunur leikur á að flíkurnar sem maðurinn keypti séu ekki í þeim gæðaflokki sem um var talað. Sölumennirnir eru sjálfir jakkafataklæddir og koma vel fyrir og virðast eiga auðvelt með að blekkja fólk, en málið frá því fyrr í dag er ekki það eina sem hefur ratað á borð lögreglu.
Þá er fólk beðið um að láta lögreglu vita ef það sér til umræddra sölumanna, sem sagðir eru vera á ljósgrárri bifreið.