„Hún er með fallegt bros á andlitinu. Ég þori að veðja að hún komi vel fram við þig“
Donald Trump Bandaríkjaforseti hefur verið gagnrýndur talsvert á samfélagsmiðlum eftir einkennilega uppákomu í Hvíta húsinu í gær. Nokkur fjöldi blaðamanna var inni á skrifstofu Bandaríkjaforseta á meðan hann ræddi við Leo Varadkar, nýjan forsætisráðherra Írlands, í síma.
Þar á meðal voru írskir blaðamenn og virtist Trump sérstaklega hrifinn af fréttakonu RTÉ í Írlandi, Caitriona Perry. Á meðan á símtali Trumps og Leo stóð nefndi hann að nokkur fjöldi írskra fréttamanna væri inni á skrifstofunni. Trump beindi svo orðum sínum að Perry og sagði meðal annars:
„Hvaðan kemur þú? Komdu hingað. Hvaðan ertu? Við erum með fullt af fallegu írsku blaðafólki hér. Hvaðan kemur þú,“ spurði Trump írsku fréttakonuna. Perry sagði honum svo hver hún væri og fyrir hvern hún starfaði. Trump sagði svo við írska forsætisráðherrann:
„Caitriona Perry. Hún er með fallegt bros á andlitinu. Ég þori að veðja að hún komi vel fram við þig,“ sagði Trump á meðan aðrir í herberginu hlógu.
Caitriona birti myndskeiðið á Twitter-síðu sinni í kjölfarið og sagði að um furðulega uppákomu hefði verið að ræða. Myndbandið hefur vakið talsverða athygli á Twitter og sitt sýnist hverjum um framkomu Bandaríkjaforseta. Einhverjir samlandar Trumps báðu hana afsökunar á framferði forsetans.
Leikarinn Kevin Chamberlin benti á að Trump hefði kallað hana til sín í þeim eina tilgangi að skoða hana og horfa á hana og bætti við að hann skammaðist sín fyrir land sitt. Þá rifjuðu margir upp að Trump hefði ítrekað verið sakaður um kynferðislega áreitni í garð fjölda kvenna í aðdraganda forsetakosninganna í fyrrahaust. Hann hefur neitað öllum slíkum ásökunum.
Myndbandið af atvikinu í gær má sjá hér að neðan:
