Konur og karlar hlið við hlið – Samkynhneigðir velkomnir
Á næsta ári stendur til að opna frjálslynda mosku í miðborg Oslóar. Það er Thee Yezen al-Obaide sem átti hugmyndina að moskunni sem mun bera heitið Masjid al-Nisa (kvennamoskan). En hann hafði áður komið á laggirnar óformlegu neti samkynhneigðra múslima í Noregi.
Í viðtali við fréttasíðuna Vårt Land segir hann: „Við þurfum að láta konurnar hafa hljóðnemann. Þær geta talað fyrir sig sjálfar.“
Moskan verður fyrir alla þá sem finna sig ekki í öðrum moskum borgarinnar. Konur, karla, samkynhneigða, gagnkynhneigða, transfólk og í raun hvern sem er. Í moskunni munu konur fá jafn mikið rými og karlar og taka jafnan þátt í ákvarðanatökunni. Konur geta verið ímamar og kynin biðja saman í sama rými.
Í vikunni opnaði fyrsta frjálslynda moska Þýskalands í Berlín. Ibn Ruschd-Goethe moskan var stofnuð af Seyran Ates, en hún hefur barist fyrir frjálslyndi innan islam um nokkurt skeið og hefur kallað eftir „kynferðis-byltingu“ innan trúarbragðanna. Meðal þess sem Ates hefur barist gegn eru heiðursmorð, barnahjónabönd og heimilisofbeldi.
Lögreglan stóð vörð þegar moskan var opnuð því að Ates og félagar bjuggust ekki við því að allir yrðu sáttir við framtakið. Það kom hins vegar ekkert upp á. Konur og karlar, sunníar og shítar, samkynhneigðir og gagnkynhneigðir munu biðja saman. Konur geta verið ímamar og þurfa ekki að ganga með blæjur.
Það tók átta ár að koma moskunni á laggirnar, sem stendur nú í Moabit hverfinu þar sem margir innflytjendur búa. Ates segir: „Ég mun ekki láta afturhaldsseggina stela rétti mínum til að vera múslimi.“ Moskan er ekki síður tilraun til að aftengja islam og stjórnmálin og senda þar með þau skilaboð að jíhadismi sé misnotkun á trúarbrögðunum.