Telja að sprengjugerðarmaðurinn gangi enn laus
Lögreglan í Manchester hefur fundið nokkrar sprengjur í aðgerðum sínum í tengslum við hryðjuverkið í Manchester Arena á mánudagskvöldið. Auk þess hefur lögreglan fundið efni til sprengjugerðar. Sprengjunum svipar til þeirrar sem var notuð í ódæðinu á mánudaginn. Snemma í morgun sprengdi lögreglan meinta sprengju sem fannst við húsleit í Moss Side hverfinu.
The Independent segist hafa heimildir fyrir að lögreglan hafi fundið nokkrar sprengjur í aðgerðum sínum en húsleitir hafa verið framkvæmdar á mörgum stöðum. Sjö manns hafa verið handteknir í tengslum við rannsókn málsins. Blaðið segir að lögreglan hafi einnig fundið efni til sprengjugerðar og aðeins hafi átt eftir að leggja lokahönd á sprengjugerð.
Ónafngreindur heimildarmaður blaðsins segir að miklar líkur séu á að enn sé ekki búið að finna allar sprengjurnar.
Kenning lögreglunnar er að Salman Abedi hafi ekki staðið einn að árásinni heldur hafi hann verið liðsmaður stórra samtaka. Ian Hopkins, lögreglustjóri í Manchester, sagði í gær að það væri nokkuð augljóst að rannsóknin beindist að stórum hópi fólks.
Meðal þeirra sem hafa verið handteknir eru bræður Abedi og faðir hans. Eldri bróðir hans var handtekinn í Manchester en yngri bróðir hans og faðir voru handteknir í Líbíu en þangað eiga þeir ættir að rekja. Þeir eru nú í haldi yfirvalda í Líbíu.