Talsverð röð hefur myndast fyrir utan verslun Costco í Kauptúni ef marka má umræður í heitasta Facebook-hópi landsins í dag, Keypt í Costco.

Þar mátti meðal annars sjá myndband sem sagt var sýna röðina í verslunina klukkan 11.10 í morgun:

Costco opnaði með pompi og prakt síðastliðinn þriðjudag og má gera ráð fyrir að þúsundir Íslendinga hafi komið við í versluninni. Má segja að hálfgert Costco-æði hafi gripið um sig meðal þjóðarinnar.

Hafi einhverjir talið að færra fólk yrði í versluninni í dag en fyrstu tvo opnunardaga hennar skjátlaðist þeim hrapallega enda frídagur hjá mörgum Íslendingum í dag. „Mikið er ég fegin að mig sárvantar ekki nokkurn skapaðan hlut,“ segir einn meðlimur hópsins í athugasemd við myndbandið.

Um 25 þúsund meðlimir eru í Facebook-hópnum, sem DV fjallaði um í gær.

Í umræðum í hópnum kemur fram að fólk bíði eftir því að geta nálgast innkaupakerrur sem ekki virðast vera nógu margar. Ein segir til dæmis og gagnrýnir hegðun sumra:

„Vá hvað fólk getur verið ömurlegt. Það er að elta kerrur út í bíla til að ná kerrunum svo að það kemst fram fyrir röðina. Þau renna beint inn á meðan við erum búin að bíða í 30 plús mínútur. Starfsmaður kom til að biðjast afsökunar og sagði að fólkið er fljótara að grípa kerrurnar en starfsfólkið. Sé þetta alveg fyrir mér í áramótaskaupinu.“