Héraðsdómur Reykjavíkur hefur dæmt karlmann í tveggja mánaða skilorðsbundið fangelsi fyrir þjófnað. Maðurinn var ákærður fyrir að fara í heimildarleysi inn í íbúð í fjölbýlishúsi í Reykjavík og stela meðal annars bakpoka, skartgripum, HDMI-snúru og debetkorti.

Maðurinn játaði brot sitt fyrir dómi, en innbrotið var framið þann þriðjudaginn 12. júlí í fyrrasumar. Maðurinn, sem er fæddur árið 1964, hefur ekki gerst sekur um refsiverða háttsemi áður svo kunnugt sé.

Konan sem bjó í umræddri íbúð fór fram á að fá 500 þúsund krónur í miskabætur en maðurinn samþykkti skaðabótakröfu að fjárhæð 143.736 krónur vegna þeirra verðmæta sem hann stal. Konan sagði að brotið hefði valdið henni mikilli vanlíðan og hún til dæmis ekki þorað að sofa í herberginu sínu í töluverðan tíma á eftir.

„Má fallast á með brotaþola að slíkt innbrot á heimili, sem er friðheilagt, sé til þess fallið að valda miska. Verða bætur ákveðnar að álitum og þykja hæfilega ákveðnar 80.000 krónur,“ segir í niðurstöðu héraðsdóms. Var maðurinn því dæmdur til að greiða konunni samtals 223 þúsund krónur og verjanda sínum 210 þúsund krónur.

Fangelsisdómurinn yfir manninum er skilorðsbundinn til tveggja ára.